Da Summa is umma…
Wos hob i draus gmocht?
Hob gebn und gnumma,
hob glebt und hob glocht.
Da Summa ziag weida
da Herbst ziag ins Lond,
mit leichtende Kleider,
mit goidenem Gwond.
Da Summa is gspeichert
in mir, gonz tiaf drin.
Er nährt und bereichert,
wenn i traurig bin.
Da Summa und i
sitzn zomm auf da Bonk.
I loa mi zu eam hi
und sog: „Recht schen Donk.“
Da Summa sogt: „Pfiati!
Gib guat auf di ocht.
I geh, wei i miad bi.
Bis boid, guade Nocht!“
Da Summa kimb wieda,
sei Wort homma drauf:
Er legt si gach nieda
und steht wieda auf.
